Edi Rama ushtroi terror mbi banorët e unazës së re. Kështu u shpreh Sekretari i Përgjithshëm i LSI, Endrit Braimllari në një intervistë në emisionin 7 pa 5 në Vizion Plus.
Braimllari tha se Edi Rama ka përdorur gjithë Policinë e Shtetit për interesat e tij personale sepse afera korruptive tek Unaza e Re është llogari personale e Kryeministrit dhe që shkon drejtpërdrejt ne xhepin e tij. Pra përdori të gjithë instrumentet shtetëror për të mbrojtur vjedhjen e tij.
“Kjo që Edi Rama po bën me banorët e Unazës së Re është një krim shtetëror sepse këta banorë që po u prishen shtëpitë kanë 30 vite që paguajnë taksat. Këtyre banorëve u kanë shkuar inspektorët e ALUZINI-t për t’i bërë legalizimet, pra janë ne procedurë legalizimi. Disa prej tyre kanë dhe shtëpi të legalizuar”, tha Braimllari.
Ish-deputeti i LSI-së theksoi se njihte efektivë që kanë qenë dje aty dhe banojnë në Shkozë, dhe Edi Rama u ka prishur shtëpinë.
“Dje ishin në krye të detyrës, sepse me atë mban familjen. Ata banorë nuk janë kundra policisë, por urdhrat politikë nga eprorët e tyre, ka bërë që aty të jetë një zonë krimi dhe të ushtrohet një dhunë e paparë në këto 30 vite.
Ministri i Brendshëm ka 10 ditë që hedh foto në faqen e tij të Facebook me një djalë që u bë histori e ndjeshme, me Alvin Berishën.
Ndërkohë aty ka me qindra fëmijë që janë si Alvin Berisha që janë të traumatizuar në një vit me dhunë dhe terror të paparë nga policia. Nuk mund të shkojnë dot në shkollë sepse nuk e dinë se ku do të flenë nesër. Që dje kanë fjetur në shi, sepse nuk kanë pasur mundësi se ku të flinin. Ky është një shtet që mendon për qytetarët e tij?
Ky është ministri i Brendshëm që del e na bën moral lart e poshtë? Kjo është një qeveri që shqiptarët e duan? Absolutisht që jo! Sepse nëse ke një fije logjikë dhe ti je i përgjegjshëm, kurrsesi ti nuk mund të bësh ato veprime me banorët e Unazës së Re, por jo vetëm dhe me banorët e Bregut të Lumit dhe me banorët e Shkozës”, tha Braimllari.
