Kryeministri Edi Rama ka paralajmëruar nga Ohri, pas konferencës së përbashkët me homologun maqedonas, Zoran Zaev, dhe Presidentin serb Aleksandar Vuçiç, se shumë shpejt do të bëhet publik ligji special kundër grupeve krinimale.
Rama tha se një grup i gjerë me partnerë ndërkombëtarë do ti futen një lufte të panjohur më parë ndaj krimit të organizuar dhe masa ndaj prokurorëve dhe gjyqtarëve të grupit “Kap ça të kapësh”.
“Lidhur me ligjin special shumë shpejt ne do ta bëjmë publik dhe më lejoni të mos nxjerr ende detaje. Kjo është edhe një arsyet e mungesës sime të zakonshme në publik. Kemi punuar me një grup të gjerë pune, me partnerë ndërkombëtarë dhe kemi grupuar shumë eksperienca botërore. Kam vendosmërinë të hyjmë në një luftë të panjohur më parë kundër krimit të organizuar dhe të marrim masa kundër prokurorëve dhe gjyqtarëve të grupit KÇK”, theksoi ai.
Rama paralajmëroi prej javësh miratimin e një ligji në Kuvend ndaj prokurorëve dhe gjyqtarëve, që sipas tij nuk e kalojnë dot vetting, por derisa t’i vijë rradha e kontrollit, po sillen si KÇK. Madje Rama nuk nguroi që t’i quajë ato si një organizatë e rrezikshme.
