Protestat masive/ Ra nga lartësia, vdes studenti në Hong Kong (Foto)

Një student në Hong Kong vdiq sot, pasi në fillim të kësaj jave ra nga një garazh parkimi, ku oficerët e policisë u përleshën me protestuesit, një zhvillim që përshkallëzoi më tej zemërimin e publikut, pas disa muajsh demonstratash antiqeveritare.

Chow Tsz-lok, i cili ishte një student në Universitetin e Shkencës dhe Teknologjisë në Hong Kong, pësoi plagë në kokë dhe legen, kur ra nga lartësia të hënën në mëngjes. Vdekja e tij sot në mëngjes u konfirmua nga Autoriteti Spitalor i qytetit.

Mijëra njerëz, përfshirë policë, janë plagosur që prej fillimit të protestave në qershor, por pavarësisht dhunës në rritje, askush nuk është vrarë në përleshjet deri më tani. Policia qëlloi dhe plagosi një demonstrues më 1 tetor.