Sapo është mbyllur takimi midis Atalantës dhe Cagliarit, e vlefshme për javën e 11-të të Seria A.
Ndeshja u mbyll me rezultatin 0-2 në favor të Cagliarit, ku rezultati u zhbllokua në minutën e 32-të, me anë të një autogoli të Pasalic. Ndërsa shtatë minuta më vonë, situata u komplikua edhe më shumë, pas një veprimi antisportiv të Ilicic, duke u ndëshkuar me karton të kuq.
Pavarësisht ndryshimeve me fillimin e pjesës së dytë nga ana e Gasperinit, duke aktivizuar Malinovskyn në vend të Gomez, dhe Hateboer në vendin e Gosens, Atalanta ishte e pafuqishme për të ndryshuar rezultatin. Madje skuadra pësoi dhe golin e dytë në minutën 59-të, me anë të Oliva.
Me këtë fitore Cagliari barazon me pikë skuadrën e Atalantës në kuotën e 21 pikëve, ku ekipi i mbrojtësit tonë Gjimshiti, ndodhet në vendin e katërt për shkak të golavarazhit me të mirë, ndërsa Cagliari gjendet në vendin e pestë.
