Mbrojtësi Arlind Ajeti, i cili aktualisht ndodhet pa ekip, raportohet se është ne bisedime me ekipin e Tiranës.
Sipas “Panorama Sport”, ai është ulur në tavolinë me drejtuesit e Tiranës, të cilët duan një mbrojtës, duke parë problemet në repartin e prapavijës. Diskutimet kanë qenë të gjata, por nuk është arritur asnjë akord.
Lojtari i Kombëtares shqiptare, Ajeti, pasi ka dëgjuar propozimin e Tiranës, i ka falënderuar dhe u ka thënë bardhebluve që për momentin nuk është i interesuar. Ai pret disa oferta nga skuadra të tjera dhe nuk ka shumë dëshirë që të luajë në kampionatin shqiptar.
Ama vetëm në rastin kur asnjë nga skuadrat që po diskuton nuk e merr apo nuk arrin në marrëveshje, do të vendosë që të zgjedhë Tiranën. Shkurt, Ajeti dhe Tirana në mes kanë një kusht dhe mbrojtësi i sheh bardheblutë si kamerdaren e shpëtimit të karrierës së tij sportive.
Për të më parë është interesuar gjithashtu ekipi i Skënderbeut, por asokohe Ajeti e refuzoi ofertën e korçarëve. Futbollisti me dy pasaporta ka luajtur 20 takime me Kombëtaren kuqezi, duke shënuar edhe një gol. Gjithsesi, prej kohësh është pa ekip dhe po stërvitet individualisht, me shpresën që në janar të gjejë një skuadër. Nëse pranon ofertën e Tiranës, mund të luajë menjëherë me bardheblutë.
