Të paktën 10 persona janë shoqëruar në polici në lidhje me atentatin që ndodhi sot në mbikalimin e Shkozetit në Durrës, ku mbeti i plagosur prokurori Arjan Ndoj si dhe u plagos shoferi i tij, Andi Maloku dhe Aleksandër Laho (Landi Muharremi).
Mësohet se aktualisht në policinë e Durrësit po merren në pyetje këta persona, që dyshohet se mund të kenë dijeni për ngjarjen, por asnjë prej tyre nuk është shoqëruar si autor i krimit.
Ndërkohë, grupi hetimor ka sekuestruar pamjet e kamerave të sigurisë të një restoranti në zonën e plazhit në Durrës, ku 3 të plagosurit kanë drekuar pak para atentatit. Gjithashtu janë duke u këqyrur të tjera pamje të kamerave që mund të çojnë hetuesit te autorët.
Dyshohet se makina tip “Benz ML” me të cilën lëviznin të plagosurit është ndjekur nga autorët, që kanë lëshuar ndaj mjetit breshëri plumbash.
