Një lajm i madh vjen përtej Adriatikut aty ku Marash Kumbulla po i bën vend vetes në futbollin elitar.
Ai po luan titullar te Hellas Verona dhe po bën mjaft mirë, pavarësisht se skuadra e tij nuk po merr rezultatet e duhura. 19-vjeçari ishte titullar dhe në humbjen ndaj Napolit, ndërsa zërat e parë të merkatos po e rrethojnë.
Gazzetta dello Sport shkruan se Kumbulla është në radarët e Juventusit.
Kampionët e Italisë e donin në skuadër, madje diçka e tillë u konfirmua dhe nga babi i tij. “Fusco dëshironte ta merrte tek ekipi U23 i Juventusit, por Verona nuk hoqi dorë nga ai. D’Amico më tha se ky do të ishte viti i Marashit.
Agjenti i tij, Gianni Vitali, i qëndron pranë dhe ai ka një kontratë deri në vitin 2022 me Veronën”.
Juventusi duket se po e vëzhgon prej kohësh, ndërsa pas “Zonjës së Vjetër” kanë shfaqur interes Fiorentina dhe Napoli. Emri i shqiptarit lakohet shumë në merkato duke parë moshën e tij të re dhe paraqitjet e mira që ka dhuruar.
