Kryeministri Edi Rama shpeshherë nuk e ka trajtuar si shqetësuese largimin e shqiptarëve drejt vendeve të BE-së, një pjesë e të cilëve kanë aplikuar për azil, kryesisht në Francë.
Për hapjen e negociatave, vendim që pritet të merret me 18 tetor, Kryeministri Edi Rama ka deklaruar se Shqipëria ka plotësuar të gjitha detyrat apo kushtet, ndërsa hodhi përgjegjësinë drejt BE-së, dhe më konkretisht drejt Francës, që ka propozuar një tjetër formulë qasjeje për zgjerimin.
Në fakt sot Presidenti francez Emmanuel Macron pohoi një gjë të tillë, por tha troç se ai nuk ka se si t’i shpjegojë francezëve se Shqipëria është vendi i dytë përsa i takon kërkesave për azil.
Madje, Macron kujtoi faktin se shqiptarët kanë përfituar nga liberalizimi i vizave, në një kohë që negociatat nuk janë hapur, dhe shqiptarët shkojnë kërkojnë azil në Francë.
Referuar statistikave dhe shifrave të publikuara, shqiptarët renditen të dytët në Francë përsa i takon kërkesave për azil. Situata është bërë shpeshherë alarmante për autoritetet franceze, por shqetësimet e tyre duket se nuk janë marrë seriozisht në Tiranë, nga qeveria e Edi Ramës.
Një vit më parë, kur Shqipëria priste vendimin për hapjen ose jo të negociatave, Rama do të deklaronte “është e vështirë për mua të kuptoj se pse vendimi i Komisionit të BE për të filluar bisedimet me ne nuk duhet të jetë detyrues për shtetet anëtare.
Ne jemi gjithashtu të gatshëm t’i kthejmë bashkatdhetarët që banojnë ilegalisht në Francë ose në vende të tjera të BE. Por besimi i shqiptarëve në BE dhe gjendja e mirë këtu do të dëmtohen. Nëse numri i refugjatëve rritet, ne presim ndihmë nga BE. Kjo është ajo që i thashë kancelarit federal Kurz në Vjenë”.
Prej 1 viti, qeveria e tij nuk ka ndërmarrë asnjë veprim për të ulur numrin e azilkërkuesve që vijon të mbetet shqetësues jo vetëm për Francën.
Sot Presidenti francez e tha hapur, duke argumentuar qëndrimin e vendit të tij, për një veto që bllokon hapjen e negociatave.
