Arrestohet Bledar Toçi, Shef i Regjimit të Brendshëm në burgun e Durrësit, i cili mbetet i plagosur nga krimi i pasionit i ndodhur në Kavajë, orët e para të kësaj të enjteje. Toçi akuzohet për vrasje me dashje. Në pranga u vu edhe vëllati i tij për veprën penale “Prodhimi dhe shitja e narkotikëve”. Në banesën e këtij të fundit, u gjet një sasi e vogël lënde narkotike, pas kontrolleve që bëri policia pas vrasjes.
“Në vijim të veprimeve të kryera nga grupi hetimor në lidhje me zbardhjen dhe dokumentimin e ngjarjes së ndodhur në lagjen nr. 2, në Kavajë, ku pas një konflikti në banesën e shtetases M.Q., mbeti i vrarë me armë zjarri shtetasi Dritan Haxholli, 41 vjeç dhe i plagosur shtetasi Bledar Toçi, nga Specialistët për Hetimin e Krimeve në Komisariatin e Policisë Kavajë u bë arrestimi në flagrancë i shtetasit Bledar Toçi, 31 vjeç, banues në lagjen nr. 2, në Kavajë, me detyrë Shef i Sigurisë së Brendshme pranë burgut të Durrësit. Ai, pasi është konfliktuar me shtetasin Dritan Haxholli, ky i fundit për motive xhelozie ka qëlluar me armë duke e plagosur shtetasin Roçin. Në kushtet e vetëmbrojtjes, shtetasi Bledar Toçi ka qëlluar për vdekje me armë zjarri tip pistolete Haxhollin. Ky i fundit ka qenë i dënuar më parë për krime kundër personit dhe për lëndë narkotike”, njoftoi policia.
Në pranga u vu edhe vëllai i Bledar Toçit, për veprën penale “Prodhimi dhe shitja e narkotikëve”.
“Bardhyl Toçi, 27 vjeç, lindur e banues në lagjen nr. 2, në Kavajë u arrestua, pasi gjatë kontrollit të banesës së tij, iu gjetën dhe u sekuestruan me cilesinë e provës materiale një sasi e dyshuar lendë kokaine e ndarë në 7 doza që i përkisnin 27-vjeçarit”, njoftoi policia.
Materialet procedurale do të dërgohen në Prokurorinë Pranë Gjykatës së Shkallës së Parë Kavajë, për veprime të mëtejshme, shtuan të njëjtat burime.
Paraprakisht, dyshohet se si viktima kishte lidhje sentimentale me shtetasen M.Q. Kjo e fundit dyshohet se i kishte dhënë fund lidhjes, por vendimi i saj nuk pranohej nga Haxholli. Ndaj ajo kishte kërkuar ndihmën e Toçit, pasi ishte njoftuar nga Haxholli se do ti shkonte në banesë. M.Q. ishte e martuar dhe nënë e 3 fëmijëve. Bashkëshorti i saj ndodhej në burg në Gjermani.
