Në një kohë kur mediat që e kritikojnë i quan kazanë dhe prej kohësh i ka vendosur nën presion, duket se Kryeministri Edi Rama është treguar zemërgjerë me Karlo Bolinon, pronarin e Report TV dhe shqiptarja.com.
I njohur për mbështetjen ndaj Rilindjes, Bolino duket se në Shqipëri nuk zhvillon vetëm media, por edhe biznes. Vendimi nuk parashikon se për çfarë do të përdoret kjo sipërfaqe, por duket se ky është shpërblimi i rradhës ndaj një prej drejtuesve të mediave që mbështesin Rilindjen.
Dhe për këtë shfrytëzohet “zemërgjerësia” e Kryeministrit, jo me pronat e tij, por ato të shtetit shqiptar. Prona të cilat mund të shfrytëzoheshin shumë më mirë se sa të jepeshin me një qira 1 euro për 20 vjet te një pronar mediash, qoftë ky edhe italian.
Dhe kundrejt një vendimi të tillë, ndoshta jepet edhe mesazhi se ata që mediat që nuk janë në tepsinë e Ramës dhe Rilindjes janë “kazan”, ndërsa të tjerë të pozicionuar në llogore me të mund të marrin edhe prona, kuptohet publike.
“Dhënien e miratimit për lidhjen e kontratës së qirasë me tarifën 1 euro/kontrata, ndërmjet Ministrisë së Financave dhe Ekonomisë, si qiradhënës, dhe shoqërisë ‘MTSC’ sh.p.k., si qiramarrës, për pasurinë shtetërore “Ish-ndërmarrje metalike ‘Tirana’’ (Reparti i orëve), prona nr. 19, me numër pasurie 7/649, me sipërfaqe të përgjithshme 4021.50 m², nga të cilat sipërfaqe ndërtimore 1624.44 m2, dhe sipërfaqe funksionale 2397.06 m2, zona kadastrale 8220, në përgjegjësi administrimi të Ndërmarrjes Industriale nr. 1, Tiranë, për një periudhë 20 (njëzet) vjet, sipas genplanit dhe tekstit të projektkontratës”, thuhet në vendimin e zbardhur të Edi Ramës.
Sipërfaqja që i dhurohet Bolinos kundrejt një qiraje simbolike, 1 euro, është plot 4 mijë metra katror, dhe skandali më i madh është fakti se kjo sipërfaqe ishte përcaktuar për të ndërtuar një shkollë.
“Plani Rregullues i Tiranës i Bashës më 2013 këtu kish caktuar Gjimnaz të ri për Tiranën, plani i 99-ave e bën biznes për një italian të dyshimtë. “Asgjë të ligë, çdo gjë me ligj””, shkruan Jamarbër Malltezi, në një postim në rrjet.
Duket se në planet e qeverisë së Rilindjes më e rëndësishme është që Karlo të zhvillojë biznesin, qoftë edhe mediatik, sesa fëmijët e Tiranës të kenë një shkollë të re, që do të mundte sadopak të zgjidhte problemin e mësimdhënies me turne.
