Aktori i njohur Robert De Niro iu bashkohet listës së personazheve publike që kanë probleme me drejtësinë. Së fundmi, ndaj dy herë fituesit të Çmimit Oscar është ngritur një padi nga një ish punonjësja e tij, e cila e akuzon për diskriminim gjinor dhe për këtë arsye ajo kërkon një dëmshpërblim prej 12 milionë dollarësh.
Graham Chase Robinson kishte punuar më parë për kompaninë “Canal Production” të De Niro dhe deklaron se u detyrua të jepte dorëheqjen nga posti i zëvëndëspresidentes për shkak të kërcënimeve dhe fyerjeve dhe për këtë arsye ajo kërkon një dëmshpërblim të majmë.
“Robert de Niro ka mbetur i kapur tek tradita e vjetër. Nuk e koncepton se burrat mund t’i trajtojnë gratë si të barabarta. As nuk i intereson dhe fakti se diskriminimi gjinor në vendin e punës është një shkelje ligjore”, shkruhet në denoncimin e ngritur ndaj aktorit.
