Kryetari i Partisë Demokratikë, Lulzim Basha tha se nga ana e opozitës, një propozim i është dërguar kryeministrit Edi Rama, për reformën zgjedhore.
“Shqipëria është në krizë, vendi është në krizë. Ne kemi një plan për ta nxjerrë vendin nga kriza, ne kemi një plan-propozim për reformën zgjedhore, ja kemi dorëzuar këtë plan Edi Ramës dhe përfaqësuesve të tij. Ta marri ta zbatojë, ndryshe të hapë krahun se jemi të gatshëm ta zbatojmë ne”, u shpreh kryedemokrati në një prononcim për gazetarët pas takimit me aleatët.
Lidhur me reformën zgjedhore, u prononcua edhe kryeministri Edi Rama pak ditë më parë, i cili tha se do zbatohet në dy hapa dhe eliminoi angazhimin opozitën në plotësimin e të parit: ndryshimet zgjedhore bazuar në rekomandimet e OSBE/ODHIR.
“Për pjesën e parë nuk ka nevojë për opozitën jashtë parlamentare dhe nuk besoj se opozita jashtë parlamentare është kundër, se ato janë rekomandime të shkruara e bardhë mbi të zezë, s’kemi ça diskutojmë, siç mund të diskutojmë të tjera aspekte që lidhen me sistemin, me të tjera ide dhe sugjerime”, tha Rama në një intervistë.
