Gazetari Arjon Sulo i ftuar në studion e lajmeve në RTV Ora u shpreh se kryebashkiaku i Tiranës, Erion Veliaj është pasuesi potencial i kryeministrit Edi Rama, me vetë kontributin e këtij të fundit.
Më tej Sulo tha se edhe ish-ministri i Jashtëm, Ditmir Bushati është alternativë e mundshme për drejtimin e PS-së, ndërsa theksoi se amendamentet e paraqitur sot nga ky i fundit vinin në dukje pakësimin e rolit të qeverisë në negociata dhe marrjen e një roli të ri më të madh të parlamentit.
Beti Njuma: Një rezolutë për çështjen e negociatave po e miraton edhe Kuvendi i Shqipërisë, por sot kemi dëgjuar Bushatin që ka kërkuar disa amendime dhe një ndër pikat kryesore ka qenë edhe përfundimi i reformës zgjedhore brenda 2019. Duket sikur ka edhe një sinjal nga ana e mazhorancës pavarësisht se Bushati nuk është në kuotat më të larta.
Arjon Sulo: Nuk është në kuotat më të larta, por ndërkohë çdo ditë kemi lajme nga Bushati. Dje fliste në një intervistë për vetëkorrigjim të PS-së për të mos kaluar në vetëshkatërrim. Pra është ai zëri ndryshe i PS-së. Për mendimin tim në të ardhmen, edhe të afërt, pas një viti apo dy vitesh do të jetë mbase alternativë e zotit Veliaj nesër, për drejtimin e PS-së. Do kandidojë, do ketë grupin e vet, platformën e vet.
Beti Njuma: Po flisni sikur Rama nuk do të ekzistojë pas dy vitesh në PS.
Arjon Sulo: Po edhe mund të tërhiqet. Duke i shkuar kalendarit normal do kemi zgjedhje në 2021 që nëse Rama i humbet i bie të tërhiqet. Por mund të kemi edhe një kalendar zgjedhjesh të parakohshme që nëse i humbet tërhiqet. Në politikë gjithmonë flitet për pasuesin. Deri tani pasuesi më potencial dhe i mundshëm në PS mendohet Erion Veliaj me kontributin e vetë Ramës. Duke i dhënë mandat të dytë, duke mos pasur rivalë të tjerë siç ishin me largimin e Tahirit. Zotin Bushati e shoh një alternativë në PS.
Por dhe pikërisht amendametet që ka kërkuar sot për Komisionin e reformës Zgjedhore për rezolutën e negociatave vinin në dukje mbarimin e reformës zgjedhore, por edhe pakësimin e rolit të qeverisë në këto negociata dhe marrjen e një roli të ri më të madh të parlamentit. Pra një rol kontrolli nga parlamenti, mbi qeverinë për procesin e negociatave. Kjo është politike shumë, pra qeveria e zotit Rama të kontrollojë. /Ora news/
