Nga Boldnews.al
“Kultivimi i kanabisit është një histori e kaluar”. Kështu deklaroi pak muaj më parë ministri i Brendshëm Sandër Lleshaj, ndërsa duke përzgjedhur fjalët shtoi se: “çdo rrënjë kanabisi që asgjësohet tani është sukses i policisë, çdo kilogram që kapet pas kultivimit, është dështimi i policisë”.
Sot droga shqiptare po noton në ujërat e ishujve të greqisë. Mediat e vendit fqinj, duke iu referuar burimeve policore konfirmuan se janë arrestuar katër shtetas shqiptarë dhe një tjetër është në kërkim, pasi iu sekuestrua 1.7 ton drogë kanabis.
“Në mesditë dalim në deklaratë për shtyp. Kemi vënë nën arrest 4 persona. Sasia më e madhe e kapur ndonjëherë në një operacion të vetëm të trafikut të drogës Shqipëri-Greqi”-thuhet në reagimin e policisë greke.
Sasia e madhe e lëndës narkotike ishte e vendosur në dy skafe, por u zbulua nga patrullimi në det i motovedetave të policisë greke. Në këtë aksion që ka zgjatur tre ditë morën pjesë edhe forcat e policisë turke, pasi dyshohet se kanabisi, duke kaluar nga Shqipëria në Greqi, kishte për destinacion përfundimtar Turqinë. Ka të dhëna se kanabisi do të shkëmbehej me heroinë, që më pas po nga grupet e trafikut shqiptaro-italian, do kapte tregun e Europës Perëndimore.
Nuk është rasti e vetëm, pasi brenda këtij muaji janë sekuestruar në operacione të ndryshme edhe 1.1 ton kanabis nga strukturat e policisë greke. Po sot a vlen deklarata e ministrit që çfarë kapet pas shtatorit është dështim i policisë?
Nuk jemi ende në nivelet e masivitetit të kultivimit të kanabisit në vitet 2016-2017, por grupe të mirëorganizuara kanë kultivuar sasi të mëdha bimësh narkotike dhe frytet e saj po shihen sot, të kapura nga policia e vendit fqinj.
Ato aksione me toga efektivesh policie që ngjiteshin shpateve të maleve ishin sa për spektaklin e propagandës, nën moton: “Shqipëria pa drogë”. I është prerë puna fshatarëve që gënjeheshin nga fitimi i shpejtë, por drogën tashmë nën kontroll e kanë marrë disa grupe të fuqishme kriminale që veprojnë në të gjithë vendin, padyshim nën mbrojtjen e një apo më shumë të mëdhenjve, në politikë apo polici.
Zonat më problematike, që i shpëtuar “syrit vigjilent” të policisë sonë mbesin Vlora, Tepelena dhe së fundmi edhe Skrapari dhe Përmeti. Trafikantët e kultivojnë kanabisin për tre muaj, më pas paketojnë dhe trafikojnë nga toka e deti duke kaluar në disa filtra të policisë.
Padyshim që shefat e mëdhenj që në supe u peshojnë spaletat e gradave i bëjnë mirë llogaritë, pasi kultivimi dhe trafikimi i kanabisit sot ka vlerë disa herë më të lartë se në kohën 2016-2017, ku edhe inspektorët e zonave ia panë hajrin mitmarrjes. Edhe pse në informacionet e brendshme policore kanë qarkulluar të dhëna për kultivimin në zona të caktuara operacione të mirëfillta në terren në këto treva ku mbillet kanabis nuk ka pasur. Duke se duhma e marijuanës ka trullosur mendjet e drejtuesve të policisë që kanë lëjuar që në zonat ku ata mbolojnë droga të gjallojë.
Gjithashtu edhe fluturimet nga ajri të avionëve special të Guardia Di Finanza nuk janë përqëndruar në hapësirat me parcela droge, veçanrisht në Malësinë e Kurveleshit, apo në zonat e thella në Skrapar e madje edhe Përmet. Gjenerali ministër, nuk gjen kohën që qoftë edhe në rrjetet sociale të reagojë për atë drogë të kapur në Greqi, si produkt “Made in Albania”.
