Aksioni kundër informalitetit ka vazhduar me bllokimin e 1.6 milionë litra gaz natyror. Drejtori i Përgjithshëm i Doganave, Arlind Gjokutaj tha se subjekti, i cili hodhi në treg gazin natyror ka shmangur 350 mijë euro detyrim ndaj shtetit.
“Kemi konstatuar një subjekt që operonte në fushën e tregtimit të gazit të lëngshëm natyror, i cili përveç parametrave cilësore dhe teknik kishte edhe mangësi në deklarimin e detyrimeve fiskale. Subjekti ka hedhur në qarkullim 1.6 mln litra gaz natyror të lëngshëm të papaguar detyrimet e akzicës. Në total detyrimi i munguar dhe penaliteti i vendosur ndaj këtij subjekti arrin shifrën prej 38 mln lekësh ose 350 mijë euro”, tha Gjokutaj këtë të pretme.
