Kryeministri Edi Rama nuk ka kursyer kritikat në drejtim të Prefektit të Durrësit, Roland Nasto, për masat e marra pas tërmeteve që u regjistruan ditën e djeshme.
Sipas Ramës, Prefekti Roland Nasto nuk ka bërë punën e tij siç duhej.
“Prefekt, mbrëmë jam marrë unë me dritat e stadiumit, gjëja më e thjeshtë ishte t’u hapej stadiumi dhe të mos rrinin në rrugica, sot stadiumi duhet të jetë i hapur dhe i pajisur me të gjithë strukturën akomoduese, janë 700 shtretër në Kavaleshencën e mbrojtjes në dispozicion. Tërmetin nuk e parashikon dot askush.
Nuk do të thotë aspak se ajo që ndodhi do të vijojë, por tërmeti është në psikologjinë e njerëzve akoma. Prandaj duhet t’u ofrojmë gjithcka, stadiumin e hapur të ndriçuar dhe kapacitetet, autobus në dispozicion nëse kanë probleme psikologjike”, u shpeh Rama.
Rama kërkoi që vëmendja kryesore e strukturave të fokusohen në Durrës, ku ishte epiqendra e goditjeve të njëpasnjëshme të tërmetit.
