Kryeministri Edi Rama ka paralajmëruar largimin e 80 % të drejtuesve të institucioneve në Qarkun e Shkodrës. Kështu pasi pranoi dorëheqjen e 4 drejtorëve, burime nga mbledhja e kordinatorëve të Veriut, që po zhvillohet në Velipojë, bëjnë të ditur se Kryeministri ka kërkuar vlerësimin performance për çdo institucion.
“80% e drejtorëve do ikin. Për të gjitha bashkitë e Qarkut Shkodër do të bëhet vlerësim performance i institucioneve me varësi nga qendra. Njëkohësisht do të bëhet analizë e buxhetit të bashkive, borxhet dhe projektet aktuale që të evidentohet se ku jemi aktualisht”, mësohet se ka deklaruar Rama.
Në mbledhje janë të pranishëm Sandër Lleshaj, drejtues politik për Lezhën, kryetari i Bashkisë se Lezhës, Pjerin Ndreu dhe deputetët Paulin Sterkaj, Luan Harusha dhe Tom Doshi.
Mësohet se gjatë takimit, është konfirmuar dorëheqja e 4 drejtorëve. Drejtori i Thesarit, Myzafer Bushi largohet nga detyra, e bashkë me të, drejtori i ARRSH, Shkëlqim Stërkaj, Hetimit Tatimor, Agron Shima dhe ai i Entit të Banesave, Brian Muriqi.
