Goditja e grupit kriminal në vitin 2018, sipas Prokurorisë, nuk e ka ndaluar atë që të kryente edhe raste të tjera të trafikut të drogës dhe këtë herë të kokainës.
Duke përdorur transportin publik, në 26 shkurt të këtij viti, Olger Bamllari dhe Aleksandër Pepi kanë organizuar një rast tjetër të trafikimit. “Në vijim të komunikimeve telefonike të përftuar nga përgjimet, provohet se lidhja e Olger Bamllarit me Aleksandër Pepin (Bani) dhe personin në Greqi me emrin Bledi, vazhdon të funksionojë dhe komunikimet janë në funksion të aktivitetit kriminal të trafikut të narkotikëve drejt Greqisë dhe shpërndarjes së lëndëve narkotike në qytetin e Selanikut, megjithëse ishin arrestuar një grup personash në muajin nëntor 2018 dhe xhaxhai i Bamllarit në dhjetor 2018”, shkruhet në dosje.
Nga hetimet ka rezultuar se organizator në gjetjen dhe trafikimin drejt Greqisë të kësaj sasie lënde narkotike të llojit kokainë ka qenë shtetasi nën hetim, Olger Bamllari, në bashkëpunim me shtetasin nën hetim, Aleksandër Pepi (Bani), i njohur dhe me pseudonimin “Veshua”, shtetasin nën hetim, Gjergji Çollaku, i cili ka mundur të gjejë dhe lëndën narkotike për llogari të shtetasit Olger, si dhe shtetasin nën hetim, Hysni Sadik, i cili do të trafikonte dhe lëndën narkotike drejt Selanikut, Greqi.
Shtetasi Hysni Sadik është nisur herët në mëngjes me autobus nga qyteti i Korçës drejt qytetit të Selanikut, Greqi, dhe kalimi do të bëhej nga Kapshtica, aty ku autobusi dhe pasagjerët i janë nënshtruar kontrollit nga Policia Kufitare.
Për shkak të kontrollit, shtetasi Hysni Sadik ka arritur të fshehë lëndën e dyshuar të llojit kokainë te tualeti i Pikës Kufitare Kapshticë dhe më pas ka kaluar drejt Greqisë, ku është lidhur në telefon me shtetasin Gjergji Çollaku, i cili ka komunikuar nëpërmjet telefonit në përdorim nga Olger Bamllari.
Në biseda, Hysni Sadik i shpjegon situatën se si ishte kontrolluar nga Policia Kufitare dhe se ku e kishte fshehur lëndën narkotike. Hysni Sadik i kërkon që të çojë një person tjetër për ta marrë lëndën te tualeti.
Nga analiza e qelizave telefonike të numrave telefonikë celularë në përdorim nga Olger Bamllari dhe Gjergji Çollaku, ka rezultuar se të dy numrat janë loguar njëkohësisht në të njëjtën datë dhe në të njëjtën orë në Korçë dhe më pas në qytetin e Bilishtit dhe Kapshticë.
Lekë për të paguar avokaten: Do lirohem si përdorues
Nga përgjimet që ka kryer Prokuroria për Krime të Rënda, është arritur të identifikohet edhe një person tjetër që është pjesë e grupit. Ai i kërkon lekë Olger Bamllarit që të paguajë avokaten e të dalë nga burgu si përdorues. “Nga biseda e zhvilluar midis Olger Bamllarit dhe shtetasit të paidentifikuar, i cili përdor numrin telefonik celular +306942422XX, bashkëbiseduesi, nga biseda kuptohet se ndodhet në grup, i cili dyshohet se mund të jetë një nga personat e arrestuar me grupin e Nikolin Kapuranit në muajin nëntor 2018, në Selanik, dhe i kërkon Olgerit t’i dërgojë lekë për t’ia dhënë avokates dhe më pas i shpjegon se nëse del përdorues, mund të lirohet”, shkruhet në dosje.
PANORAMA
