Refik Halili është shumë i qartë. Tira na e tij është në rrugë të mbarë. Dukej shumë qartë në fund të takimit që presidenti ishte i kënaqur me atë që dha skuadra e tij në fushë. Jo vetëm kaq, por ai komplimentoi të gjithë djemtë për atë që dhanë në fushën e lojës. në fund të takimit ai dha një deklaratë ekskluzive për “Panorama Sport”, teksa pohoi se tani pret të tjera fitore nga ekipi.
“I kemi borxh komunitetit bardheblu, tifozëve tanë. Jam i gëzuar për fitoren sepse skuadra është shumë mirë, reagoi psikologjikisht dhe nuk u dorëzua. Më pëlqeu skuadra, grinta dhe ritmi. Shpresoj që të ecim gjithmonë kështu. Duhet të ecim shtruar. Nuk duhet të humbasim. Nuk duhet të bëjmë gabime, sidomos në fushën tonë dhe për të vazhduar aty ku duam të gjithë, drejt titullit, kemi shumë punë. Është rrugë e gjatë dhe duhet shumë kujdes”, tha në fillim Halili.
Një tjetër gëzim personal ishte edhe goli i shënuar nga i biri, Grent Halili. I treti për sulmuesin bardheblu. Vetë presidenti i Tiranës ndihet krenar për arritjen e të birit dhe këtë herë deklaroi se ishte shumë i kënaqur me atë që bëri Grenti në fushën e lojës.
“Për Grentin u gëzova si asnjëherë tjetër. Ishte një fitore që duhej. Një gol që na çliroi dhe Grenti e shënoi atëherë kur duhet. Shpresoj që skuadrën, Grentin dhe të gjithë djemtë t’i ndihmojë i madhi Zot”, vazhdoi më tej presidenti i Tiranës. 100-vjetori i klubit është një vit jubile, një arsye më shumë për të kërkuar titullin kampion. Titulli është një shije e largët në shtëpinë e bardhebluve, por ky duket viti i duhur për të rikthyer kryeqytetasit aty ku i takon.
Gjithçka këtë sezon rrotullohet rreth këtij objektivi, faza përgatitore, merkato, afrimet dhe konfirmimet, të gjitha janë në funksion të titullit kampion. Askush nuk fshihet më, as presidenti Refik Halili, trajneri Ardian Mema, i cili e ka të qartë se ekipi i tij këtë sezon futet në fushë jo për të mbijetuar, por për të arritur majat e klasifikimit. “Kuptohet që për mua janë të rëndësishme si Kukësi dhe Partizani. Çdo trepikësh është i rëndësishëm.
Një këshillë kam për djemtë. Duhet ta marrin me kujdes dhe mund t’ia dalin për të ecur përpara”, ka mbyllur Refik Halili. Në dy javët e ardhshme ekipet pretendente si Partizani e Kukësi do të përballen menjëherë me Tiranën, bardheblutë kërkojnë të krijojnë një shkëputje me rivalët. Atmosfera në shtëpinë e bardhebluve është pozitive, të gjithë besojnë se ky është viti i duhur për të arritur objektiva të rëndësishëm. Gjithsesi, si fillim Tirana duhet të kalojë një herë ndeshjen e Kupës me Shënkollin.
