Matteo Sartori, turisti Italian 33 vjeçar, humbi jetën pak ditë më parë, pas një goditje që pësoi në një mjet lundrues, 20 milje larg portit të Durrësit.
Pavarësisht ndërhyrjes së ndihmës së shpejtë nga autoritetet shqiptare dhe transportimit të turistit drejt Italisë, ai humbi jetën në një spital italian.
Por Sonia Mercato, e fejuara e 33-vjeçarit Italian, hedh akuza ndaj autoriteteve shqiptare, që sipas saj u vonuan në dhënien e ndihmës së shpejtë.
Duke qenë se nuk kishte mjete të përshtatshme për fluturim gjatë natës, anija u drejtua drejt portit të Durrësit dhe Marko më tej u transportua nga një anije patrullimi për transport mjekësor.
Gjatë natës, ai u transportua në spitalin e Traumës në Tiranë, ku u vendos në kujdes intensiv për gati tre ditë. Pastaj, prindërit e tij e transferuan në spitalin Sant’Antonio në Padova me një fluturim që ndaloi në Brescia. Sartori, mbërriti në Itali në gjendje të rëndë për jetën.
“Në Shqipëri nuk kanë pajisje për t’u marrë me këtë lloj emergjence. Ata nuk arritën të vinin dhe të merrnin Matteon me një helikopter dhe u humb shumë kohë. Ne u lamë të vetëm në det. Ai ishte një person i mrekullueshëm, i pëlqyer dhe i vlerësuar. Që kur fatkeqësia ndodhi, nuk mund të fle më në shtëpinë tonë dhe kam shkuar te prindërit e mi”, thekson Mercato për mediat italiane.
Sonia tregon më tej se i kanë dhuruar organet e Matteos, ndërsa datën e funeralit nuk e kanë përcaktuar akoma.
Si ndodhi ngjarja
Dy të dashuruarit ishin duke ngrënë darkën e fundit në udhëtimin e tyre të planifikuar me kroçerë me 10 shtator 2019, kur Matteo duke ngrënë karkaleca preu lehtë gishtin. Ai u ngrit menjëherë nga tavolina dhe vendosi të shkojë në kabinë për të vendosur një ankerplast.
I riu italian vuante nga emofobia, dhe duket se kjo ka ndikuar në aksidentin që pasoi pak sekonda më pas, kur ai u rrëzua nga shkallët e anijes, duke përplasur kokën, që i shkaktoi fraktura të mëdha në kafkë.
Pas pesë ditësh dramatike, ai vdiq në spitalin e Padovas. “Ekipi i shpëtimit mbërriti vonë. Matteo dhe unë do të martoheshim. Në vend të organizimit të dasmës do të më duhet të shkoj në funeralin e tij. Kjo është diçka e pakonceptueshme”, thotë Sonia.
