Nga Boldnews.al
Kryeministri Edi Rama udhëtoi sot drejt Berlinit në axhendën e takimeve për çështjen e hapjes së negociatave më 18 tetor të këtij viti. Rama u prit në një takim prej 30 minutësh nga kancelarja gjermane Angela Merkel dhe disa deputetë të bundestagut. “Shumë i inkurajuar nga vlerësimet dhe predispozita pozitive ndaj Shqipërisë e kancelares Merkel”, shkroi Rama në Facebook, duke shoqëruar edhe me një foto pas takimit.
Kjo mënyrë propagande, vlen vetëm për Rilindasit këtu në Shqipëri. Ata që qëndrojnë pas karriges së pushtetit me shpresë për ta mbajtur sa më gjatë dhe të tjerë të papunë e të vorfën, por me bindje për të votuar çdo personazh që vesh bluzën socialiste.
E vërteta është krejt ndryshe. Shqipërisë mund t’i jept një “po” për hapjen e negociatave por me disa kushte, ku më kryesoret mbetet rishikimi në aspektin ligjor dhe moral të votimeve të 30 qershorit, të dhëna për luftën kundër korrupsionit, apo shitblerjen e votave. Në të trija pikat, Rama nuk ishte si shpjegues, por i dyshuar si i përfshirë vetë në këto vepra, që padyshim janë krime, për më tepër të paimagjinueshme në një vend si Gjermania.
Pavarësisht koperturës që çdo lider botëror do i vishte këtij takimi, Merkel është dukshëm e distancuar nga politikat e qeverisjes sonë dhe mbi të gjitha do i duhet që të dëgjojë zërin e deputetëve të CDU-CSU-së, aleatë të qeverisjes së saj. Në Gjermani zyrtarët e lartë nuk kanë nevojë të mësojnë shqip apo anglisht për të kuptuar masakrën elektorale. Gazeta më e madhe gjermane Bild publikoi të dhëna audiopërgjime nga dy dosje hetimore, 339 dhe 184.
Në të parën shfaqet ish-kryebashkiaku Vangjush Dako dhe zyrtarë lokal në përgjime me Astrit Avdylajn, një të dënuar për vrasje dhe sot të akuzuar edhe për trafik ndërkombëtar të lëndëve narkotike. Ndërsa në dosjen 184 del edhe vetë Rama, ish-ministra dhe deputetë të tij duke komunikuar me njerëz të botës së krimit dhe drejtues policie për shitblerjen e votave dhe shantazh ndaj votuesve në zgjedhjet lokale të shtatorit 2016 në Dibër.
Hapja e negociatave me kushte, do ishte si vdekje politike për Ramën, por një e mirë për vendin, që gjithsesi mbetet ende me shpresën se faktori i rëndësishëm ndërkombëtar këtë herë nuk do të mjaftohet vetëm për të ndikuar në zgjidhjen e momentit të krizës politike dhe institucionale në Shqipëri.
Edhe vetë Rama e ka kuptuar se aty në Gjernai ai shihet si një i dyshuar, gati në kufijtë e një të akuzuari, ndaj e ka të vështirë të shitet ndryshe nga çfarë është. Me ne këtu e ka më të lehtë që me një foto të prishë edhe me shumë mendjet e shprishura, por aty në kancelarinë kryesore të Europës është një personazh politik që po mbahet gjithnjë e më larg, pse jo edhe nënë “survejim” si i rrezikshëm për trazira në Ballkan, vëçanarisht me idenë e tij dhe të Thaçit për ndarjen e Kosovës.
Ai ndodhet në Gjermani dhe ka mundësi që të kryejë një “rrugë e dy punë”. Së pari të fusë në xhep negociatat dhe e dyta ashtu krenar të takojë avokatin e pajtuar për të ndjekur procesin gjyqësor ndaj gazetës gjermane Bild dhe gazetarit Peter Tielde, që e ka “akuzuar” që nga Tirana për shpifje.
Paçka se në dukje e ka këtë mundësi, atij nuk do i bëjnë këmbët të hapë me tej një dosje që kërkon ta varrosë me ndihmën e Markut të tij në Prokurorinë e Përgjithshme. Rama kërkon kohë për të shëruar plagën e tij me fenomenin e shitblerjes së votave dhe lidhjet me elementë të krimit, për të cilën ai nuk do heqë kurrë dorë, duke u vërtetuar kjo edhe me tre kryabshkiakë që i dolën me të shkuar të rëndë kriminale.
