Policia Kufitare e Rinasit ka ndaluar mëngjesin e sotëm, Luan Memën, marinarin e anijes së rrëmbyer, “Çelepia 2”. Ndalimi i tij, u bë pas kthimit nga Egjipti, ku mbahej nga autoritetet vendase pas sekuestrimit të anijes së marrë peng nga egjiptiani Adel Mohamed Salam.
Ndalimi i marinarit lidhet me rrëmbimin rreth 1 muaj më parë të anijes së peshkimit “Çelepia 2” në portin e Durrësit dhe udhëtimit të saj drejt Egjiptit.
Pritet që marinari i ndaluar të merret në pyetje për të dhënë informacione për rrethanat e rrëmbimit të anijes, arsyet e saj, si dhe për kapitenin Dhimitër Malja, për të cilin ende nuk dihet asgjë për vendndodhjen e tij të mundshme.
Adel Mohamed Salam mori peng anijen dhe u vendos në portin e Aleksandrisë në Egjipt, prej nga kërkonte një shumë të konsiderueshme eurosh, në këmbim të lirimit të anijes dhe marinarëve të marrë peng.
Ndërhyrja e policisë egjiptiane, mundësoi lirimin e njërit prej pengjeve, marinarin Luan Mema, ndërsa ende nuk dihet asgjë për fatin e kapitenit.
