Kreu i Kuvendit Ilir Meta kërkoi sot “Mujo Ulqinakë” për të mbrojtur dinjitetin e Parlamentit të ardhshëm. E duket se Meta i ka gjetur.
E para që i është përgjigjur thirrjes së tij është rinia e Lëvizjes Rinore për Integrim. Dejana Kallogjeroviç, Kryetare e strukturës kombëtare të studentëve në LRI, si dhe këshilltare bashkiake e Tiranës, nëpërmjet një postimi në faqen e saj të facebook, solidarizohet me liderin e LSI dhe shkruan se me të janë të gjithë Mujo Ulqinakë.
“Meta nuk është i interesuar te pushteti. Është i gatshëm të japi dorëheqjen ai vetë dhe çdo ministër apo funksionar i LSI. Meta është për të fuqizuar të rinjtë, për t’i dhënë jetë shpresës për një vend më të mirë, për një Shqipëri më Pozitive! Ilir Meta na ke gati, me ty, jemi të gjithë Mujo Ulqinaku!”, shkruan ajo.
Mujo Ulqinaku, ishte dëshmori i parë i Atdheut nga ushtria e Mbretit Zog, i rënë në Durrës gjatë pushtimit të Italisë fashiste më 1939.
LRI edhe më herët ka kërkuar që në zgjedhjet e ardhshme Ilir Meta të jetë kryeministër i Shqipërisë.
Ndërsa vetë Meta sot, ndërsa u tregua i gatshëm edhe për dorëheqje foli edhe për Mujo Ulqinakun.
“Kam një pyetje për ju, a mos mendoni se nuk ka kërkohet të bëjmë as sakrificat që bëri Ismail Qemali dhe të tjerë, por të nderojmë sakrificën e Ismail Qemalit, por të bëjmë fare pak se sa bëri Mujo Ulqinaku. Një shqiptar i thjeshtë, i zakonshëm që nuk do ta njihte askush. Mos kujtoni ju se Mujo Ulqinaku doli për të ndaluar një perandori 40-milionëshe dhe për ta mundur Italinë? Jo, ai bëri një akt patriotik për të mbrojtur vendin e tij dhe dinjitetin e tij dhe mund t’u them që ky akt patriotik duhet nga ne për të mbrojtur dinjitetin e Parlamentit të ardhshëm”, është shprehur Meta.
