Nga Boldnews.al
“Fusha” shpk duket se ka krijuar “monopolin” e miliardave që lëvron Bashkia e Tiranës dhe institucionet nën varësinë e saj në tenderat publikë.
Bashkia e drejtuar nga Erion Veliaj i ka siguruar “Fusha” shpk kontratat e majme për ndërtimin e Sheshit mbi Parkim “Skënderbej”, si edhe rikonstruksionin multi-milionësh të bulevardit “Zogu I”.
Gjithashtu, Veliaj, me ndërhyrjen e fuqishme të kryeministrit Edi Rama, i siguruan kompanisë “Fusha”, me një ligj të posaçëm, ndërtimin e kompleksit të kullave, poshtë të cilave mendohet të jetë edhe Teatri Kombëtar.
Por, nuk janë vetëm kaq. Disa tendera, nga institucione të dorës së dytë, të gjithë nën varësinë e Bashkisë së Tiranës, i kanë siguruar “Fusha” shpk mbi 4.5 miliardë lekë (të vjetra) në vetëm 7-8 tendera.
Ujësjellësi i Tiranës
Shoqëria Ujësjellës-Kanalizime Tiranë, një institucion nën administrimin e Bashkisë së kryeqytetit të drejtuar nga Erion Veliaj, rezulton se është një nga strukturat “më bujare” në favor të kompanisë “Fusha” shpk.
Në vetëm 5 tendera, të zhvilluar në periudhën 2017-2019, “Fusha” shpk ka përfituar në total 4.6 miliardë lekë (të vjetra) tendera të zhvilluar nga Ujësjellësi i Tiranës.
Portali informativ “openprocurment.al” ka publikuar të dhëna mbi transaksionet e kryera nga institucionet e varësisë të institucioneve qendrore dhe atyre lokale.
Në bazë të të dhënave, rezulton se “Fusha” shpk, në bashkëpunim me një kompani tjetër, “2T”, e përfolur në media për lidhjet direkte me kryeministrin Edi Rama, kanë fituar një tender të vetëm, me vlerë 4 miliardë lekë.
Ky tender është zhvilluar në Korrik 2018 dhe kontrata është lidhur pas 3 muajsh, në Tetor 2018.
Objekti i tenderit ishte “Shtesë e Impiantit të Përpunimit të ujit të pijshëm Bovillë me 1800 l/sek , në fazën e parë të zbatimit për 600 l/sek”.
Në këtë tender merrnin pjesë edhe 4 operatorë të tjerë, të cilët u skualifikuan. Dy prej tyre nuk kishin dhënë asnjë ofertë ekonomike, duke e shndërruar pjesëmarrjen e tyre në një procedurë fiktive.
Ndërsa dy të tjerat u skualifikuan, pas një “verifikimi të hollësishëm” të kryer nga organizatorët e tenderit. Në të dhënat publike nuk paraqitet asnjë analizë mbi plotësimin e specifikimeve teknike nga bashkimi i operatorëve “2T & Fusha”.
Krahas këtij tenderi “të majmë”, Ujësjellës Kanalizime Tiranë ka shpallur fitues “Fusha” shpk edhe në 4 tendera të tjerë, me vlerë totale rreth 550 milionë lekë (të vjetra).
Tirana Parking
Në vlera më të vogla, krahasuar me tenderat e Ujësjellësit, por edhe “Tirana Parking” nuk mbetet pas në raportet me “Fusha” shpk.
Në periudhën 2018-2019, “Tirana Parking” ka bërë pagesa në favor të “Fusha” shpk në vlerën 250 milionë lekë (të vjetra), në 4 procedura prokurimi publik me të njëjtin objekt: “Shërbime të Pastrimit dhe Gjelbërimit në sheshe mbi dhe nën tokë dhe terminale”.
Në këto tendera nuk ka marrë pjesë asnjë kompani konkurente, për shkak të një veçantie. “Fusha” shpk, krahas fitimit të tenderit për ndërtimin e parkimit nëntokësor në sheshin kryesor të Tiranës, “Skënderbej”, ka përfituar “bonus” edhe procesin e pastrimit të shesheve nën tokë dhe terminale.
