Dikur Rama i priti si heronj dhe deklaronte se ata ishin ambasadorët më të mirë por ministri i Jashtëm në detyrë, Gent Cakaj iu ka hequr pasaportat diplomatike futbollistëve të kombëtares shqiptare të cilët u dekoruan me to pas pjesëmarrjes në Europianin e vitit 2016.
Lajmin e ka bërë të ditur futbollisti i Tiranës dhe njëherazi kryetari i Sindikatës së Futbollistëve Andi Lila mbrëmjen e djeshme i ftuar në “Procesi Sportiv”.
Lila shprehet se përveçse u ka hequr pasaportat, ministri nuk u ka dhënë as edhe një motivacion për këtë çdekorim nga ana e tij.
“Kur shkuam në Europian 2016, të gjithë e kishin vëmendjen te ne, por më pas, kjo iku si me sustë. Dua të them dhe diçka. Në atë kohë, kryeministri Rama na dekoroi me pasaporta diplomatike, duke na treguar si ambasadorët më të mirë të Shqipërisë në Botë. Ministri i ri që vjen, që për koincidencë është edhe nga Kosova, na heq këto pasaporta diplomatike. Na dekoruan, dhe më pas na çdekuruan. Kur futbollistët shqiptarë luftonin në Beograd për flamurin shqiptar, dhe bënin jehonë, të gjithë na vinin nga mbrapa. Tani, ne duam një motivim, nuk na ka thënë asnjë fjalë” – deklaroi Andi Lila.
