Zyrtari i lartë i DASH-it, David Kostelancik, duket se do të angazhohet për zgjidhjen e krizës politike në Shqipëri.
Kostelancik, Drejtori për Europën Qendrore dhe Jugore në Departamentin e Shtetit, pritet të takohet me përfaqësues të forcave politike, ku një nga çështjet e rëndësishme që do të diskutohet është edhe gjetja e një zgjidhjeje për krizën politike.
Kështu pas vizitës së bërë në Tiranë nga nënkryetarja e grupit parlamentar CDU/CSU që u prit në takime të veçanta nga kreu demokrat Lulzim Basha, presidenti Ilir Meta dhe Kryeministri Edi Rama, zyrtari i lartë amerikan është i dyti ndërkombëtar që angazhohet në këtë fillim vjeshte për zgjidhjen e krizës
Kostelancik do të nisë të enjten takimet me përfaqësues të politikës shqiptare. Ai është një diplomat karriere dhe e njeh ambientin politik në Tiranë pasi ka qenë pjesë e stafit të ambasadës së SHBA.
Deri pak muaj më parë ai ka qenë zëvendësambasador i SHBA në Hungari. Gjithashtu ka mbuluar në DASH marrëdhëniet me Rusinë.
