Jemi vetëm disa orë larg mbylljes zyrtare të merkatos, që shënon si afat të fundit orën 22:00 të datës 2 shtator dhe Roma po nxiton për të bërë lëvizjet e fundit që do të kompletonin organikën e trajnerit Paulo Fonseca.
Kështu mbrëmjen e djeshme u arrit marrëveshja me Leipzigun për transferimin në Bundesligë të sulmuesit çek Patrick Schick, i cili do të shkojë me formulën e huazimit dy vjeçar me detyrim blerjeje për shifrën e 25 milionë eurove.
I ardhur te Roma në verën e 2017-ës, Schick nuk kishte arritur të shndërrohet titullar te verdhekuqte, duke mos bindur asnjërin prej trajnerëve të shumtë që kanë ndërruar njëri-tjetrin në pankinë gjatë kësaj kohe, ndaj edhe u vendos largimi i tij.
Ndërkohë për të plotësuar numrat, Roma arriti marrëveshjen me sulmuesin kroat të Atleticos së Madridit, Nicola Kalinic, i cili pritet të mbërrijë nesër në kryeqytetin italian, për të kryer vizitat mjekësore dhe firmosur kontratën me verdhekuqtë.
Huazim kundrejt 2.5 milionë eurosh dhe e drejtë blerjeje për 9 milionë euro është formula e transferimit të Kalinic, i cili nuk është grumbulluar nga trajneri Simeone për ndeshjen që madrilenët do të luajnë sot ndaj Eibarit.
