Banorët e Himarës kanë protestuar sot me thirrje drejtuar kryeministrit Edi Rama të mos u prishë shtëpitë. Ata mbanin në duar pankarta ku shkruhej: “Zoti Kryeministër, mos na prishni shtëpitë dhe bregun e detit”.
Drejtori Ekzekutiv i Shoqatës Komuniteti Himariot, Nikollaq Neranxi, thotë se “ndryshe nga propaganda dhe mashtrimi i Kryebashkiakut Jorgo Goro, sipas të cilit vetëm 5 individë të papërgjegjshëm nuk i dashkan punet e tij gjasme në të mirë të komunitetit, në fakt situata është ndryshe”.
Banorët janë të zhgënjyer sepse dikush do t’i grabisë, do t’i dëbojë nga shtëpitë shekullore, thotë ai.
“Ata e kanë kuptuar lojën e ndyrë që po luhet në kurriz të tyre, prandaj i drejtohen Ramës, si kryeministër dhe si biri i nëne nga bregu. Nuk mund të shkatërrosh në emër të gjasme zhvillimit! Bëni rrugë, ujësjellës, pastrim biologjik të ujërave të zeza, vini telefon e internet, restauroni shtëpitë e vjetra, kala dhe kisha dhe lërini këta njerëz ta bëjnë vetë turizmin në vendin e të parëve të tyre”- thotë ai.
Banorët nga ana e tyre shprehen të vendosur të rezistojnë deri në fund dhe mbi të gjitha, nuk pranojnë pazaret e askujt që do vijë me para të pista t’i bindë të lënë tokën e tyre.
