Kryeministri Edi Rama do të jetë i pranishëm në “Toronto Global Forum”, i cili do të zhvillohet në Kanada në datat 4 -6 shtator, i ftuar nga “International Economic Forum of the Americas (IEFA)”.
Kryeministri Rama do të mbajë një fjalim në edicionin e 13-të “Leading the new economy”, ku do flitet për çështje ekonomike kombëtare dhe botërore. Pritet që kryeministri i Shqipërisë të flasë në datën 5 shtator në mesditë mbi çështjet e energjisë, infrastrukturës dhe zhvillimit të qëndrueshëm në perspektivën e ballkanit.
Në krah të tij në panel do të jetë Kerry Adler, president dhe drejtor ekzekutiv i “Sky Power Global Group”, një kompani që operon në fushën e energjisë diellore. Ndërsa në mbrëmjen e 6 shtatorit kryeministri shqiptar do të ketë një darkë në Toronto me anëtarë të diasporës shqiptaro-kanadeze, e organizuar nga ambasadori i Shqipërisë në Kanada.
Kjo është vizita e parë e kryeministrit të Shqipërisë Edi Rama në Kanada dhe nuk klasifikohet vizitë zyrtare.
