Banorët e dy fshatrave në Fier kanë protestuar kundër firmës që po zbaton projektin e ndërtimit të infrastrukturës ndihmëse për gazsjellësin TAP. Banorët shprehen se kjo firmë ka ndryshuar projektin e rrugës duke iu dëmtuar tokat bujqësore.
Dhjetëra banorë të fshatrave Sheq- Marinas dhe Seman në protestë kanë thënë që nuk do ta lejojnë firmën pasi dëmton rrugën kryesore me mjetet e rënda, ndërtimi i një aksi tjetër nga ana e kësaj firme, është bërë pengesë për ta për të shkuar tek tokat e tyre bujqësore.
Sipas protestuesve, mungesa e rrugëve lidhëse i ka nxjerë tokat e tyre bujqësore tërësisht jashtë funksionit, ndërsa theksojnë se firma fillimisht kishte premtuar se do të kryente investime në shërbim të komunitetit, por asgjë nuk është bërë.
Ndërkohë përfaqësuesit e firmës zbatuese të këtij projekti kanë theksuar se nuk ka devijim të projektit, ndërsa duke biseduar me banorët kanë premtuar se rrugët lidhëse të tokave bujqësore do të kenë prioritet në vijimësi të punimeve.
Banorët e kësaj zone kanë theksuar se nëse nuk ndërhyet nga ana e qeverisë për ti dhënë zgjidhje problematikave të tyre, atëherë ata do të përshkallzojnë protestat.
