Gjykata për Krimet e Rënda ka dhënë masën e sigurisë “arrest ne burg” për Gentian Dodën, i ekstraduar nga Anglia tre ditë më parë.
Ai akuzohet për korruptimin me 30 mijë euro të gjyqtarit të Apelit Tiranë, Shkëlqim Miri.
Sipas prokurorisë, kundrejt ryshfetit gjyqtari Miri la në fuqi vendimin, që ndryshoi një dënim të mëparshëm ndaj Dodës nga vrasje në plagosje të rëndë. “Jam i pafajshëm, do të përballem me drejtësinë” u shpreh ai, por gjyqtari Sandër Simoni e la në burg. Masa e sigurisë e dhënë në mungesë për të u ekzekutua një muaj më parë, kur ai u arrestua në Mbretërinë e Bashkuar.
