Një përplasje me armë zjarri ka ndodhur jashtë rezidencës së ish-presidentit të Kirgizstanit, Atambayev, pasi forcat speciale zbarkuan aty për ta arrestuar, pas akuzave për korrupsion.
Trupat e armatosura, të veshur me veshje anti-plumb sulmuan rezidencën e Atambayev në fshatin Koi-Tash në orët e vona të së mërkurës, ndërsa mbështetësit e tij reaguan me shkopinj dhe gurë.
Dëshmitarët thanë se të shtëna u dëgjuan brenda rezidencës, por nuk ishte e qartë se kush kishte qëlluar.
Komiteti i Sigurisë Kombëtare këmbëngulte që mbështetësit e Atambayev ishin duke përdorur armë zjarri kundër trupave, të cilët kishin vetëm plumba gome në krehërat e tyre.
Ministria e Shëndetësisë raportoi se të paktën 46 njerëz, mes tyre 15 forca të ligjit, u plagosën në përleshje, duke pësuar plagë me armë zjarri, tronditje dhe lëndime në kokë.
Sipas raporteve, Atambayev u arrestua dhe u mor që andej me helikopter.
