Gazetari Erl Kodra, ka dhënë një zgjidhje për ndërtimin e teatrit të ri Kombëtar, pa prishur atë të vjetrin. Sipas Kodrës, aty ku ndodhet sot Teatri i Operas dhe Baletit si dhe Biblioteka Kombëtare duke përfshirë edhe gropën e Hajdin Sejdisë, mund të përdoret për të ndërtuar një godinë të madhe kulture, duke përfshirë 3 institucionet e lartpërmendura.
Kodra thekson se paratë për të ndërtuar këtë vepër gjigande mund të merren tek PPP-të e Edi Ramës.
Ja postimi i Kodrës:
Ka një zgjidhje për Teatrin Kombëtar dhe jo vetëm, por edhe për Teatrin e Operas dhe Baletit dhe Bibliotekën Kombëtare.
Të tre këto objekte mund të ndërtohen në vend të Pallatit të Kulturës, duke përfshirë edhe truallin e Gropës së Hajdin Sejdisë. Ne kemi nevojë jetike për një Bibliotekë Kombëtare, për një Teatër Opere dhe Baleti dhe një Teatër Kombëtar. Ky do të ishte një investim i jashtëzakonshëm që do t’i shtonte vlerat kryeqytetit, jo vetem kulturore, por edhe arkitektonike. Sheshi Skënderbej do të merrte kuptimin e munguar si qendër graviteti.
Ka njëqind arsye pse shteti shqiptar duhet të bëjë një investim të tillë, arsye të cilat do t’i shtjelloj në një shkrim tjetër, por më kryesorja është vlera e jashtezakonshme që do të fitonte qëndra e Tiranës. Ky investim me siguri që do të ishte strategjia e duhur për Tiranën, Kryeqyteti i shqiptarëve.
Pallati i Kulturës është një godinë e shëmtuar e stilit sovjetik, pa ndonjë vlerë trashgimie kulturore ose arkitektonike.
Paratë për këtë investim gjigand?
Ato para gjenden nëpër PPP-të e Edi Ramës.
