Lidhur me videon e publikuar pak ditë më parë në media, ku shtetasi Ramazan Rraja dhunonte barbarisht gruan e tij pranë ambjenteve të QSUT në Tiranë, policia pasi e ka shoqëruar në komisariat dhunuesin, ka marrë vendimin për ta proceduar në gjendje të lirë.
Gjithashtu, Policia ka marrë vendimin dhe për të pezulluar nga detyra efektiven e policisë, e cila u gjend aty pranë vendit të ngjarjes, dhe nuk ndërhyri.
Njoftimi i Policisë
Tiranë
Lidhur me videon e publikuar në mediat sociale, ku një i ri shfaqet me pamje duke dhunuar një femër në oborrin e spitalit “Nënë Tereza”, Tiranë, në interes të opinionit publik informojmë se:
Ngjarja në fjalë ka ndodhur në datë 31.07.2019, rreth orës 07:30 minuta.
Shërbimet policore kanë shoqëruar në Komisariat shtetasin R.Rr. 26 vjeç dhe e kanë proceduar penalisht. Materialet në ngarkim të këtij shtetasi janë referuar në Prokurori për veprime të mëtejshme.
Gjithashtu, Drejtoria e Standardeve Profesionale në Policinë e Shtetit, pas pezullimit nga detyra të punonjëses së Policisë që ishte pranë vendit të ngjarjes, ka nisur verifikimet për veprimet apo mos veprimet e saj.
