Pandi Cunge, kryetar i FRESSH për Ersekën, është emëruar administrator i Njësisë Administrative Qendër, bashkia Kolonjë, nga kryebashkiaku, Erion Isai.
Isai nuk do të tërhiqte vëmendjen me vendimin e marrë duke emëruar Cungen, nëse ky i fundit nuk do të përfshihej në një ngjarje kriminale dy ditë para votimeve të 30 qershorit.
Sikundër raporton “Dosja” Cunge ka qëlluar me thikë 35-vjeçarin E.K, pasi ky i fundit kishte ofenduar në rrjetet sociale kandidatin e Rilindjes, Erion Isai.
Ndaj Cunges, i plagosuri kishte bërë kallzim penal, që duket nuk e ka penguar aspak kryebashkiakun, një prej aktorëve të humorit, që ndoshta duke e marrë me shaka ngjarjen e ndodhur, e ka emëruar administrator të një prej njësive administrative.
Por ky nuk është precedent i vetëm për Cungen, pasi rezulton se edhe në 2018 është arrestuar nga policia pasi tentoi të korruptonte efektivët e Rrugores me 20 mijë lekë të vjetra.
Madje, emri i tij përmendet edhe në disa nga denoncimet e ish-kryeministrit Sali Berisha, sipas të cilit Pandi Cunge shantazhonte dhe kërcënonte zgjedhësit për të votuar në favor të PS-së.
