Gushti ka mbyllur një stinë politike, por vjeshta vjen shpejt dhe zërat se të huajt do të zbarkojnë në Tiranë për negociata lidhur me krizën janë shtuar. A2 CNN ka kontaktuar me institucionin e Kryeministrisë dhe Partinë Demokratike lidhur me mundësinë e negociatave në muajin shtator.
Burime nga Kryeministria thanë se nuk pritet të ketë delegacion ndërmjetësues dhe as nuk ka asnjë negociatë që bëhet nga të huaj.
Nga ana tjetër, burimet pranë Selisë Blu i thanë A2 CNN se presin që në shtator Tiranën ta vizitojë një delegacion i rëndësishëm, me përfaqësues nga Bundestagu gjerman.
Por a është e gatshme Partia Demokratike për të negociuar me kryeministrin Edi Rama? Të paktën aleati i PD, republikani Fatmir Mediu e pranon se duhet dialoguar me Edi Ramën.
“Opozita nuk është institut politik që hedh mendime dhe ide, por ka veprim politik dhe aksion politik dhe ndeshet me të gjitha format me kundërshtarin. Por përveç asaj duhet të ketë edhe një gjë tjetër në konsideratë, që duhet patjetër që ta shohë si komunikim politik, ne nuk e zgjedhim se kush është kryetar i Partisë Socialiste,” tha Mediu për Vizion Plus.
Kreu i PR foli edhe për djegin e mandateve.
“Padyshim që djegia e mandateve solli një sensibilizim më të madh ndërkombëtar dhe shoqëror, d.m.th protesta masive dhe interes ndërkombëtar. Por padyshim solli edhe moskuptime, sepse krijonte situatë të precedentëve të papranueshëm në rajon, se nuk është vetëm Shqipëria që gjykojnë ndërkombëtarët. Dhe këtu opozita duhet të ishte më e kujdesshme në mënyrën se si duhet ta trajonte”.
Sipas Mediut është emergjente që të gjendet një zgjidhje për krizën, pasi në tetor Shqiperia pret vendimin për negociatat e vitin e ardhshëm ajo do të marrë edhe kryesinë e radhës së OSBE-së.
