Mëngjesin e kësaj të enjte, Presidenti i vendit Ilir Meta, në profilin e tij në Facebook ka postuar një video të vjetër të kryeministrit Edi Rama. Në një intervistë për Blendi Fevziun në vitin 2000 Rama shprehej se ishte në vullnetin e qeverisë së drejtuar nga Meta që qendra historike e Tiranës të mos prekej. Me këtë video Meta rikthen në vëmendje se ai është pro mbrojtjes së godinës së Teatrit Kombëtar dhe qendrës historike të Tiranës.
Postimi i Metës:
Të dashur miq!
Po ju njoh me faktin se dje i kam dërguar një letër Aleancës për Mbrojtjen e Teatrit Kombëtar, për të konfirmuar mbështetjen time në aplikimin e saj drejtuar organizatës prestigjoze “Europa Nostra” për mbrojtjen e kompleksit të Teatrit Kombëtar dhe Teatrit Kombëtar Eksperimental.
Po kështu të gjitha qëndrimet e mia në mbrojtje të trashëgimisë historike e kulturore të Tiranës, kanë qenë dhe janë në koherencë të plotë për këtë çështje prej 20 vitesh.
Dëgjoni ju lutem kryeministrin aktual, z.Rama se si e konfirmonte këtë fakt në vitin 2000, kur shërbente me devocion të jashtëzakonshëm si ministër Kulture, në qeverinë që unë drejtoja.
Kujtojmë me videon e mëposhtme, se që në kohën që Rama ishte kryebashkiaku i Tiranës ishte pro shembjes të godinës së Teatrit Kombëtar.
