Kreshnik Çollaku ka komentuar komentuar zhvillimet më të fundit në Bashkitë e vendit, ku në zyra po shkojnë të votuarit e 30 Qershorit.
Në studion e Faxnews, Çollaku tha se me instalimin në zyra të kryebashkiakëve të 30 Qershorit, zhduket pushteti vendor dhe vendi kthehet në një diktaturë, njësoj si me komitetet ekzekutive të kohës së komunizmit.
“Për mua nga sot nuk ka më Bashki, po ka vetëm komitete ekzekutive. Kur flasim për autonominë vendore, ajo sot po vdes, nuk ka më këshilla bashkiakë, po ka komunitete lagjesh, njësoj si në kohën e regjimit komunist.
Kam dëgjuar nga mediat që nga nesër dhe Tirana do të ketë komitetin e saj ekzekutiv, praktikisht nga sot është rrëzuar një nga kolonat e pushteteve.
Po instalohen disa njerëz të pavotuar dhe të pamandatuar, njësoj si bënë farsën në 30 Qershor, edhe tani po instalojnë dhunshëm disa individë në institucione të cilat duhet të ishin zgjedhur. Jemi në fazën e fundit të një grushti shteti, dhe për fat të keq po heshtin dhe disa ndërkombëtarë që deri më dje kanë deklaruar të kundërtën e saj”, u shpreh Çollaku.
Zyrtari i PD-së tha se forca politike ku ai bën pjesë do të bëjë rezistencë në të gjitha bashkitë e vendit, ku do të tentohet të merren peng Bashkitë.
“Nxis çdo qytetarë që të rezistojë njësoj siç ndodhi në Devoll. Sot jemi në kushtet e viteve 90, pasi qytetarët nuk kanë votuar, dhe po përpiqet që të instalohet një diktaturë e re.
Në zyrë po instalohet një person që nuk ka marrë votat e 6% të qytetarëve. PD nuk e njeh këtë proces që po ndodh, e gjitha kjo është një vepër penale. Si mundet një dekret i presidentit të rrëzohet me intervistën e një ambasadori, kushdo qoftë ai.
Nuk mundet të ndodhë kjo në një vend demokratik, as në vendet afrikane. Ambasadorët nuk mund të sillen si një parti e tretë në vendin tonë, nuk mund tiu kërkojmë më shumë sesa duhet, pasi ata përfaqësojnë qeveritë e tyre”, tha Çollaku.
