Kryeministri Edi Rama ka reaguar sërisht lidhur me përplasjen te Teatri Kombëtar dhe kundërshtitë mbi projektin e qeverisë për shembjen e godinës ekzistuese dhe ndërtimin e një teatri të ri, si pjesë e një projekti me kulla shumëkatëshe.
“Disa persona jetojnë vazhdimisht në luftë me të tjerët, me vetveten, me jetën e tyre! Për këtë arsye shpikin vepra teatrale imagjinare, skenarin e të cilave e përshtasin me sikletet e tyre”, shkruan Rama në rrjet, duke cituar Paulo Coelho.
Një ditë më parë, policia u përlesh me artistë, aktorë dhe pjesëtarë të shoqërisë civile, që prej muajsh mbrojnë Teatrin Kombëtar.
Madje nuk munguan skenat e dhunës dhe goditja e aktorëve dhe regjisorëve, çka shkaktoi reagime të shumta.
