Kryeministri Edi Rama ka njoftuar ndryshimet në drejtimin e qarqeve në PS. Emra të rinj drejtuesish të Parisë Socialiste u vendosën në Shkodër, Lezhë dhe Tiranë.
“Propozoj ndryshime në udhëheqjen e qarqeve duke ndjerë nevojën për të përmirësuar drejtimin politik”, tha Rama. Në Shkodër, Rama lajmëroi ikjen e Bushatit nga lidershipi dhe zëvendësimin e tij me Valdrin Pjetrin, i zgjedhur kryebashkiak në votimet e 30 qershorit të cilat shefi i qeverisë i cilëson të ligjshme, pavarësisht kundërshtisë së opozitës dhe Presidentit Ilir Meta.
Në Lezhë, njoftoi drejtues Sadnër Lleshin në vend të Lindita Nikollës, për të cilën tha se e pret një tjetër detyrë.
Ndërsa në Tiranë tha se do të vendoset në drejtim Elisa Spiropali dhe Ervin Bushati, duke zhvendosur nga posti i drejtueses Blerina Gjylametin.
“Ndërsa qarqet e tjera qëndrojmë siç jemi dhe sot të presim rezultatet e punës”, shtoi.
Ndryshime njoftoi edhe në radhët e sekretariatit.
“Sa i përket sekretariatit, do bëjmë disa axhustime të nevojshme. Kemi krijuar bazën për një format të ri organizmi i me tre këshillat drejtues, dhe puna parashihet te jete goxha e rëndësishme dhe jo vetëm mbledhje për emërime apo largime politike, kemi menduar të kemi një sekretare që do të koordinoje punën për të pasur ndjekje të detyrave dhe nevojave te dala nga këshilli, do ngarkoj Ilir Beqjan”, tha Rama.
Më tej, njoftoi se, Partia e Dixhitalizuar do të jetë nën drejtimin e Blerina Gjylametit. Drejtimin e Rinisë ia drejtoi ministrit të Punëve të Jashtme Gent Cakaj. Ndërsa për Lindita Nikollën tha se do të merret me burimet njerëzore. /BN/
