Presidenti amerikan Donald Trump ka shkaktuar reagime të shumta nëpër rrjete sociale me pyetjet e tij gjatë bisedës me fituesen e Çmimit Nobel, aktivisten nga Iraku. Nadia Murad i ka treguar se ia kanë vrarë nënën dhe gjashtë vëllezër, ndërsa Trumpi më pas e ka pyetur: “E ku janë ata tani?”
Nadia Murad është aktiviste e cila i ka mbijetuar robërisë seksuale të ISIS-it. Militantët e kanë torturuar dhe përdhunuar, dhe pas arratisjes nga robëria u shndërrua në person të fushatës për lirimin e Jazidëve.
Murad në bisedë me presidentin Trump ka thënë se përkundër asaj që ISIS është larguar nga Iraku, qeveritë kurde dhe irakene ende luftojnë rreth kontrollit mbi rajonin ku kanë jetuar Jazidët, ndërsa i ka bërë thirrje presidentit amerikan që të ndërhyjnë.
“Ju mund të zgjidhni problemin tonë qysh sot. Tani nuk ka ISIS, mirëpo ne nuk mund të kthehemi, sepse qeveritë kurde dhe irakene po luftojnë mes vetes rreth asaj se kush do ta kontrollojë rajonin tonë. Dhe ne nuk mund të kthehemi nëse nuk mund të mbrojmë dinjitetin tonë, familjet tona”, ka thënë Murad.
“Por ISIS-i ka shkuar”, ka thënë Trump.
Murad i ka thënë se ISIS e ka vrarë nënën e saj dhe gjashtë vëllezër. Pastaj Trump e ka pyetur: “E ku janë ata tani?” Murad është përgjigjur: “I kanë vrarë. Gjenden nëpër varreza masive në Sinjar”.
Mirëpo kjo nuk është e tëra. Trump e ka pyetur Muradin për çka ka fituar Çmimin e Nobelit. “Për atë se pas gjithë asaj çfarë ka ndodhur, unë nuk kam hequr dorë. Jam kujdesur që të gjithë ta dinë se ISIS ka përdhunuar mijëra gra jazide. Kjo ishte hera e parë që një grua nga Iraku doli haptas dhe foli për atë çfarë ka ndodhur”. Më pas Trump e pyeti: “Vërtetë? Kjo është hera e parë?”
“Po, është hera e parë?”, përgjigjet ajo.
“Domethënë ti je arratisur?”, ka thënë Trump. Ajo është përgjigjur: “Po, mirëpo ende nuk e kam lirinë time, sepse asnjë pjesëtar i ISIS-it nuk ka dalë para gjykatës”.
