Sekretari për Çështjet Ligjore në Partinë Demokratike Çlirim Gjata, në një deklaratë nga selia blu e konsideroi të paprecedent vendimin e dytë të Gjykatës së Durrësit, pa marrë vendim apeli për të parin.
Sipas tij ky vendim është simboli i drejtësisë private që ka ngritur Edi Rama. Më pas shtoi se ky vendim dhe dhjetëra të tjerë e faktojnë Edi Ramën si armikun më të madh të drejtësisë së barabartë për të gjithë. “3 vjet pas miratimit konsensual të ndryshimeve kushtetuese, drejtësia private e Edi Ramës nuk ka ndëshkuar asnjë zyrtar të lartë”, tha Gjata.
Deklarata e plotë
Vendimi i Gjykatës së Durrësit, pak ditë më parë, është simboli i drejtësisë private që ka ngritur Edi Rama.
Vendimi skandaloz, i paprecedentë në historinë e qytetërimit perëndimor, ku vendimi i gjykatës ndryshohet të nesërmen nga e njëjta gjykatë, sipas interesit të kryeministrit, është dëshmia më tronditëse për kapjen totale të drejtësisë nga Edi Rama dhe grupi i strukturuar kriminal i Rilindjes.
Vendimi i Gjykatës së Durrësit për të ndryshuar një vendim pa e apeluar atë dhe dhjetëra vendime te tjera antikushtetuese me refomën në drejtësi, e faktojnë Edi Ramën si armikun më të madh të drejtësisë së barabartë për të gjithë.
3 vjet pas miratimit konsensual të ndryshimeve kushtetuese, shqiptarët janë dëshmitarë se drejtësia private e Edi Ramës nuk ka ndëshkuar asnjë zyrtar të lartë. Asnjë ministër, asnjë zyrtar i lartë publik, asnjë politikan nuk ka dalë para drjetësisë për vjedhjen e përditshme të shqiptarëve.