Drejtori i Policisë Rrugore të Tiranës, Mitat Tola në një prononcim për gazetarët tha se policia ka marrë masa që të garantojë lëvizje sa më pa probleme për të gjithë ata qytetarë që udhëtojnë drejt destinacioneve turistike.
Sipas tij, masat janë marrë që në muajt prill e maj, ndërsa për të garantuar sigurinë e mjeteve policia rrugore ka angazhuar edhe shërbime shtesë, kryesisht në akset që të çojnë drejt plazheve.
Por gjatë raportimit të tij për mediat, një aksident ka ndodhur pas krahëve të tij.
Aksidenti ndodhi për shkak se dy mjetet nuk respektuan distancën që duhej mes tyre. Fatmirësisht nuk ka pasur të lënduar, por vetëm dëme materiale.
Deklarata e Drejtorit të Policisë Rrugore:
‘Sezoni ka filluar tashmë, edhe ne kemi filluar herët me masat përgatitore, që në muajt prill- maj. Polica rrugore është e vendosur në të gjithë akset rrugore, kryesisht në zonat turistike. Jemi të përqendruar dhe kemi shërbime shtesë. Monitorojnë trafikun, ndërhyjmë për zhbllokimin e tij dhe bëjmë kujdes që drejtuesit të mos i shkelin rregullat’,- tha ai.
Ndër shkeljet më të shpeshta gjatë këtyre kohëve, Tola renditi shpejtësinë, konsumimin e alkoolit.
Ai tha ndër të tjera, se një risi e këtij sezoni ka qenë edhe dërgimi i gjobave në adresën e shkelësit.
‘Ka filluar të bjerë numri i masave me ndalim. Janë rritur masat e gjobave në mungesë që tani i dërgojmë me postë në shtëpinë e qytetarëve’.
Por, pavarësisht masave të marra, Tola renditi edhe disa prej akseve ku ka problematika dhe trafik të rënduar.
‘Akset më problematike janë autostrada Tiranë-Durrës, pjesa e Gjirit të Lalzit, pjesa nga Durrësi në drejtim të Vlorës, Fieri ka njëfarë lehtësimi për shkak të by pass-it. Problematike mbetet zona e Vlorës dhe Sarandës. Pjesë problematike është edhe Fushë-Kruja për shkak të punimeve rehabilituese që po ndodhin në hyrje të qytetit’,– tha Tola, ndërsa rekomandoi pushuesit që zgjedhin jugun të kalojnë nga Elbasani që të mos mbeten në trafikun e Durrësit.
