Nuk ka të ndalur kultivimi dhe trafikimi i lëndëve narkotike në vendin tonë. Policia ka bërë të mundur kapjen e 3 personave të akuzuar për kultivimin e 1 mijë rrënjësh kanabis.
Tre persona janë arrestuar, pasi dyshohet se kishin kultivuar kanabisin me kubikë.
Droga ishte kultivuar në fshatin Ballaj të Martaneshit dhe tre personat e arrestuar kishin më shumë se një muaj që merreshin me bimët narkotike.
Njoftimi i policisë:
Në vijim të kontrollit të pandërprerë të territorit , si dhe në bazë të informacioneve të marra në rrugë operative, se në malin e Ballenjës, njësia administrative Martanesh, disa persona po përgatiteshin për të kultivuar bimë narkotike, nga ana e Komisariatit të Policisë Bulqizë, u organizuan shërbime sekrete, dhe si rezultat u finalizua me sukses operacioni policor “Ballenjë-2019”.
Nga këqyrja e vendit të ngjarjes policia ka gjetur dhe sekuestruar në cilësinë e provës materiale :
- Një armë zjarri automatik model 56, me 30 fishek
- 1324 kubik(gota plastike), të mbjella të dyshuara me fara cannabis sativa
- Vegla pune, tuba plastike që do shërbenin për kultivimin në tokë të fidanëve që u gjetën në gotat plastike.
Materialet hetimore do ti referohen Prokurorisë pranë Gjykatës së Shkallës së Parë Dibër për veprat penale “Kultivimi i bimëve narkotike”, “Prodhim dhe shitja e narkotikëve”, “Mbajtja pa leje dhe prodhimi i armëve, armëve shpërthyese dhe municionit” kryer në bashkëpunim.
