Karabaku është kundërshtar i Partizanit për turin e parë kualifikues të Champions-it dhe nesër të kuqtë i presin në shtëpi azerët. Por, kampionia e Azerbajxhanit duket se e ka stresuar shumë kampin e kuq, kryesisht në fazën përgatitore që kanë zhvilluar në Slloveni.
Aq e madhe ka qenë përndjekja dhe gjurmimi i azerëve ndaj Partizanit, sa trajneri Franko Lerda dyshon te çdo i panjohur që shikon në stërvitje. Mësohet se gjatë fazës në Slloveni, Karabaku ka pasur emisarët e tij pranë kampingut të “demave”, të cilët kanë mbajtur shënim çdo lëvizje që Partizani ka bërë gjatë dy javëve.
Bezdisja e azerëve ka qenë aq e madhe, sa ia kanë bërë fiksim trajnerit italian të Partizanit, i cili seancat e fundit vendosi t’i bënte të mbyllura, por me “sytë katër” nga rrethimi për të evidentuar ndonjë spiunazh të mundshëm. Në dallim nga një ditë më parë, dje trajneri nuk e ka vazhduar seancën stërvitore pa u larguar të pranishmit në tribunën e stadiumit të Kamzës. Për të qenë korrekt, ishin tre fëmijë të vegjël, dy tifozë të kuq të zonës dhe një gazetar.
Qetësia e munguar te trajneri u pa që para stërvitjes, gjë e cila tregonte se italiani ndodhet në tension para Karabakut. Seancat e fundit kanë qenë të karakterit tekniko- taktik dhe 51- vjeçari ka kërkuar që përgatitjet të mbeteshin “top-sekret”, në mënyrë që të mos kishte rrjedhje informacioni, që mund t’i vlente kundërshtarit.
Ndonëse ekipi ka mbërritur në stadiumin e Kamzës që në orën 10:00, seanca e djeshme ka nisur rreth orës 10:45. Me sa duket, përzgjedhja e orarit, që ekipi të përgatitej në temperatura të larta, është një strategji e mirëmenduar nga trajneri Lerda, i cili kërkon që të tijtë të fitojnë imunitet me vapën.
NDËRPRERJA E STËRVITJES
Prania e një kamere të një televizioni kombëtar, që po filmonte jashtë rrethimit, mbi tarracën e një ndërtese ngjitur me stadiumin, i ka “tërbuar” drejtuesit e Partizanit. Madje, ka qenë vetë drejtori i përgjithshëm Olsi Rama që ka kërkuar llogari për xhirimet fshehtas.
Më pas, gazetari është pozicionuar para portës dytësore të stadiumit për të regjistruar një hyrje për kronikën që do të përgatiste rreth përgatitjeve të Partizanit ndaj Karabakut. Por, sapo Lerda ka parë që kamera ka qenë e fiksuar nga fusha, ka bërtitur dhe ka urdhëruar lojtarët të ndërpresin stërvitjen dhe të mos vazhdojnë me ushtrimin specifik, që kishte të bënte me perfeksionimin e një goditjeje standarde.
Në këtë moment, afër rrethimit është afruar një zyrtar i klubit, i cili ka kërkuar që të mos filmohej. Kur është mësuar se cili ishte misioni i pozicionimit të kamerës, trajneri është qetësuar dhe ka vijuar normalisht stërvitjen, e cila kishte të bënte me disa skema që të kuqtë do të zbatojnë ndaj Karabakut.
