Pamje të tjera vijnë nga grabitja që ndodhi të enjten në aeroportin e Rinasit. Skandal.al ka publikuar pamje filmike të regjistruara nga një kamerë përballë pistës që sheh të gjitha lëvizjet e grabitësve, nga hyrja e tyre, kërcënimi me armë marrja e thasëve me para dhe largimi i autorëve. Gjithçka ndodh për 2 minuta.
Në orën 14:20 të së enjtes, nga pamjet duket se, në vendndalimin e avionit të një linje ndërkombëtare, ndodhet pak metra përballë tij makina e blinduar e shoqërisë së sigurimit që kishte të ngarkuara paratë e transportuara. Mes avionit dhe makinës ku ndodheshin paratë ndodhet një makinë që shoqëron avionët e linjave pas uljes për në vendndalimin e tyre, automjet i shërbimeve të koncesionarit të Rinasit-TIA.
Në orën 14:24, Benzi i grabitësve mbërrin në pistë dhe parkon vetëm 10-12 metra larg nga makina e parave, makina e shërbimeve si dhe avioni-të gjendur thuajse në një vijë të drejtë.
Në pamje duket se nga makina e grabitësve, del vetëm njeri prej grabitësve, ai drejtohet ne derën e hapur në krahun e djathtë të makinës së blinduar ku ndodheshin paratë.
Në sekondat që grabitësi është në derën e hapur, në krahun e djathtë të makinës së blinduar të parave, makina e shërbimit të koncesionarit të aeroportit-TIA, largohet nga vendi ku po qëndronte prej minutash, para se të niste grabitja.
Pas largimit të kësaj makine të shërbimeve të aeroportit-TIA, grabitësi i parë kalon në krahun tjetër të makinës së blinduar ku ishin paratë, nga pjesa e përparme e saj.
Ndërkohë një grabitës i dytë del nga Benzi dhe i drejtohet portës në krahun e djathtë të makinës
së blinduar. Sapo ai mbërrin atje, thuajse njëkohësisht, para makinës së blinduar-ngjitur me të, mbërrin një tjetër makinë-makina e shërbimit kargo të koncesionarit të aeroportit të Rinasit-TIA.
Makina ndalon aty, ndërsa dy persona po kryejnë grabitjen.
Më pas grabitësit e ngarkuar me thasë në duar, largohen nga makina e blinduar dhe vrapojnë në drejtim të makinës së tyre.
Gjatë largimit të grabitësve ata gati përballen me automjetin kargo të aeroportit, por nuk ndodh asgjë.
Makina e autorëve largohet me shpejtësi nga pista dhe gjithçka ka mbaruar, pa asnjë ndërhyrje.
