Sikur të mos mjaftonte fakti që kemi të bëjmë me disa prej krimeve më tw frikshme në botë, këto krime edhe sot e kësaj dite mbesin të pazgjidhura.
Krimi i pamundur
Një mbrëmje të vitit 1974, punëtorët e ndërtimtarisë në Indianapolis, që punonin për kompaninë “Dowling Construction”, mbyllën vendpunimin, duke lënë një gjyle të shkatërrimit të ndërtesave të varur në një kran, më shumë se 60 metra në lartësi. Kur operatori u kthye të nesërmen në punë, ai u ngrit në kran dhe hyri në kabinën e tij, para se të vërente që gjylja e çeliktë mungonte. Ajo ishte zhdukur në tërësi. U bënë hetime dhe hulumtime të thukëta. U bënë edhe shpallje publike. Policët mbetën të habitur nga kjo vjedhje. Nuk u gjet kurrë asnjë gjurmë e gjyles, e cila peshonte rreth tri tonelata dhe nuk ishte një gjësend që mund të futej në xhep.
Misteri i dhomës së mbyllur
11 qershor 1920, Menhetën, Nju-Jork, SHBA – Joseph Elwell, një anëtar i pasur i një klubi, 45-vjeçar, u gjet i plagosur për vdekje në apartamentin e tij në adresën “244 West 70th Street” në Nju-Jork. Elwell njihej mirë në qarqet e shoqërisë si mjeshtër i lojës me letra. Ai ishte gjetur pa vetëdije në paradhomën e apartamentit nga shërbëtori i tij. Në ballë ai kishte një plagë plumbi. Policia e vlerësoi vdekjen si vetëvrasje edhe pse revolja nuk u gjet. Gëzhoja e plumbit u gjet. Paratë dhe stolitë e personit nuk ishin prekur. Kjo vrasje edhe sot e kësaj dite mbetet e pazgjidhur dhe njihet si vrasja e dhomës së mbyllur, meqë dera ishte mbyllur nga brenda.
Margaritarët e kurorës irlandeze
Në një moment midis 28 qershorit dhe 6 korrikut të vitit 1907, një a më shumë persona të panjohur, kishin hyrë në dhomën-kasafortë të kullës “Bedford”, në Kështjellën Dublin dhe kishin vjedhur margaritarët e kurorës irlandeze, të cilat asokohe ishte thënë se kapnin vlerën prej 250,000 funtesh. Kushdo që t’i kishte vjedhur ata margaritarë, do të duhej ta kishte pasur çelësin, meqë asnjë dry nuk ishte thyer dhe nuk kishte shenja të hyrjes me dhunë. Si kishin mundur hajnat t’i siguronin tërë ata çelësa të nevojshëm edhe sot e kësaj dite mbetet mister, meqë mbajtësi i vetëm i çelësave ishte Sër Arthur Vicars, i cili atë kohë gjendej jashtë vendit. Më pas ishte konstatuar se do të duheshin midis 15 deri 20 minuta për t’i hequr margaritarët nga vendet e tyre. Gjatë kësaj kohe, asnjëri nga katër rojat të armatosur deri në dhëmbë nuk kishin vërejtur ndonjë gjë të dyshimtë dhe, përkundër një hetimi të thukët, të bërë nga “Scotland Yard”, kurrë nuk u gjet asnjë gjurmë e këtyre margaritarëve.
