KQZ i është përgjigjur përmes një shkrese kërkesës së presidencës lidhur numrin e deputetëve në Kuvendin e Shqipërisë, si edhe shpërndarjen e tyre në zonat elektorale.
“Numri aktual i mandateve të deputetëve të Kuvendit është 122 deputetë”, thuhet në shkresën e KQZ-së dërguar Presidencës.
Përmes një shkrese zyrtare, më datë 14 qershor, Kreu i Shtetit iu drejtua Komisionit Qëndror të Zgjedhjeve, duke i kërkuar t’i vihet në dispozicion lista shumë emërore e deputetëve të Kuvendit, pas dorëzimit të mandateve të deputetëve të opozitës dhe zëvendësimit të tyre.
Më herët, aktorë politikë kanë hedhur idenë se nëse parlamenti nuk ka 140 deputetë, që është edhe rasti aktual, Presidenti duhet të shpërndajë parlamentin dhe vendi të shkojë në zgjedhje të parakohshme.
Nga Presidenca është artikuluar se “Meta është zgjedhur nga një parlament legjitim, jo nga ky i sotmi”.
Ndërkohë, sot, PS ka depozituar në Kuvend kërkesën në Kuvend për shkarkimin e Metës nga posti i Presidentit.
