Antonio Conte u prezantua mëngjesin e djeshëm si trajneri i ardhshëm i Interit, duke nënshkruar një kontratë 3-vjeçare, ndërsa menjëherë në mbrëmje u nis drejt Madridit bashkë me drejtuesit zikaltër, për të ndjekur finalen e Ligës së Kampionëve.
Pasditen e sotme Conte pati kohë edhe për një takim me pronarin e Interit, Zhang Jindong, i cili gjithashtu udhëtoi drejt Madridit, ndërsa burimet thonë se tekniku dhe drejtuesit kanë marrë garanci për investime në merkato.
Vetëm pas minuta pas takimit me Zhang Jindong, mediat në Itali kanë raportuar edhe për “dhuratën” e parë që Interi i ka bërë Antonio Contes. Bëhet fjalë për sulmuesin boshnjak Edin Dzeko, i cili pritet që të prezantohet si futbollisti më i ri zikaltër, që nga dita e hënë.
Interi ka arritur akordin me Romën për të transferuar Dzekon për 13.5 milionë euro, ndërsa sulmuesi do të nënshkruajë një kontratë 2-vjeçare, me pagë prej 4 milionë eurosh në sezon.
Krahas Dzekos, gjatë javës së ardhshme në Milano pritet të udhëtojë edhe Eljif Elmas, mesfushor nga Maqedonia Veriore, që thuhet se do t’i bashkohet Interit, nëse do të kalojë me sukses vizitat mjekësore.
Zikaltrit kanë arritur akordin edhe me Fenerbahcen për Elmas, ndërsa tashmë fjalën do ta kenë ekzaminimet mjekësore, pas të cilave pritet të zyrtarizohet marrëveshja, ndërsa bashkë me Dzekon dhe Godin, mesfushori maqedono-verior mund të bëhet përforcimi i tretë për Interin, në merkaton që sapo ka filluar.
