Opozita e bashkuar ka thirrur një tjetër protestë kombëtare pasditen e 2 qershorit para Kryeministrisë.
Kjo është protesta e 7-të e opozitës që prej 16 shkurtit, kur nisi seria e protestave, që në disa raste ka pasur format e mosbindjes civile.
Opozita kërkon largimin e Edi Ramës nga posti i kryeministrit, si hapin e parë për uljen në dialog dhe krijimin e një qeverie tranzitore, që do të përgatisë zgjedhjet e parakohshme parlamentare.
Megjithëse nuk dihen ende detaje mbi protestën, ajo do të nisë në orën 19:00, ndërsa pritet të zgjasë disa orë.
Kreu democrat Lulzim Basha i ka bërë thirrje qytetarëve që t’I bashkohen protestës, duke u shprehur se tashmë koha kur do të largohet Rama është në dorën e tyre.
Në anën tjetër, LSI, një prej partive pjesë e opozitës së bashkuar, ka publikuar spotin, me anë të të cilit i tregon qytetarëve pse duhet të jenë të dielën në protestë.
“Protesto për të ardhmen”, “Protesto për Shqipërinë”, janë disa prej mesazheve që përcillen në spotin e LSI.
